الخصوصية

مقدّر المشروع

لما تكتب فكرتك في المقدّر، النص بيتبعت لمزوّد نموذج الذكاء الاصطناعي اللي بنستخدمه (Anthropic) عشان يجهّز الخطة، وبنضيف عليها الأرقام من جدول أسعارنا. إحنا مش بنحفظ النص ده عندنا، ولا بنستخدمه في أي تسويق. Anthropic بتتعامل مع النص حسب سياسة الخصوصية بتاعتها.

السجلات الفنية بتحتفظ بحالة الطلب ومدّته ونوع المشروع وحجمه وأرقام تشغيل عامة بس، من غير النص نفسه ولا أي بيانات عنك. وبنعدّ الطلبات لكل عنوان IP لمدة ساعة عشان نمنع الإساءة، من غير ما نربطها بيك.

لو سيبت رقمك

لو اخترت تسيب اسمك ورقم الواتساب بعد ما الخطة تطلع، بنحتفظ بيهم مع ملخص الخطة، وبصمة مشفّرة لعنوان الـ IP، ونوع المتصفح (عشان نمنع الإساءة)، لمدة 30 يوم على الموقع، وبعدها بيتمسحوا أوتوماتيك. عمرو بيوصله إشعار بالإيميل بالبيانات دي عشان يتواصل معاك. مش بنبيعهم ولا نشاركهم مع أي جهة تانية، ومش بنستخدمهم في رسائل تسويقية.

عايز نمسحهم قبل كده؟ كلّمنا على واتساب وهنمسحهم في أقرب وقت.

القياس على الموقع

القياس عندنا نصّين. الأول بيشتغل لكل الناس من غير أي كوكي: بنسجّل إن حاجة من تمن حاجات معروفة حصلت (بداية التقدير، ظهور الخطة، الضغط على واتساب، سيبان الرقم…) وعلى أنهي صفحة، وبس. من غير كوكي، من غير عنوان IP، ومن غير أي حاجة إنت كتبتها.

التاني هو كوكي إعلانات جوجل، اللي بيقول لنا الإعلان جاب نتيجة ولا لأ. ده مش بيشتغل غير لما توافق عليه من الشريط اللي بيظهر تحت، ولو رفضت مش بنشغّله خالص — والقياس الأول بيفضل شغّال عادي في الحالتين.

غيّرت رأيك؟ امسح بيانات الموقع من المتصفح وهيسألك تاني.

تواصل

أي سؤال عن الخصوصية، كلّمنا على واتساب أو اتصل بينا: +20 101 916 2341.